LEGAZPI CITY – Padagos na nakabantay an Tiwi Municipal Disaster Risk Reduction and Management Office (MDRRMO) mapadapit sa pig-aandamang epekto ni Tropical Depression “Wilma”, amihan, asin shearline.
Segun ki Tiwi MDRRMO Head Manuel Damo sa intrevista kan Bombo Radyo Legazpi na katakod kan epekto kan mga naunambitang raot nin panahon an nagdeklara na an saindang lokal na gobierno nin class suspension.
Paramientras man nindang pinagbawalan an saindang mga residentes parasisira sa paglawod, pagbalyo, asin pagkarigus sa mga salog asin kadagatan nganing maibitaran an mga pagkalamos asin katakot pang insidente.
Kun pagbabasehan man suboot an mga parametros an dae man ninda piglalaoman na makaka-eksperyensya an saindang banwaan nin mga makukusog na pag-uuran arug kan uran na ibinagsak ni nakaaging bagyong Verbena.
Sa ibong kaini an pighayag kan opisyal na mantenidong naka-preparar an saindang ofisina nganing tumabang sa mga barangay na makakamate nin baha na dadarahon bako sana kan bagyong Wilma kundi pati na an amihan asin shearline.
Nagpapadifisil man sa sainda sa presente partikulamente na sa saindang operasyon an 12 oras na brownout bako huli sa raot nin panahon kundi an pigsasagibong pagpapakarhay kan National Grid Corporation of the Philippines.
Naka-preposition na man an mga foodpacks an saindang lokal na gobierno para sa mga residentes nindang ma-ebakwar sa mga evacuation center mantang padagos sindang nakikipag-olay sa Department of Social Welfare and Development para sa augmentation support enkaso magkulang an saindang supply.
Nagpagirumdom si Damo sa saindang mga residentes na magin rigmat asin alerto sa saindang palibot urog na an mga nagtetenir sa landslide prone area, hararani sa kadagatan, nasa kabuludan nganing makalikay sa anumang peligro na ika-kawsa kan mga raot nin panahon.
