LEGAZPI CITY—Idineklarang drug-cleared asin drug-free municipality an banwaan kan Tiwi, Albay sa ikinundusir na deliberation na Regional Oversight Committee on Barangay Drug Clearing/Municipal Drug-Cleared.
Segun ki Philippine Drug Enforcement Agency Albay Officer Noe Briguel, sa intrevista kan Bombo Radyo Legazpi, nag-evaluate, nag-assess asin nagde-deliberate kan mga barangay kan banwaan o ciudad an mga miyembro kan Philippine National Police (PNP), Philippine Drug Enforcement Agency (PDEA), Department of the Interior and Local Government (DILG) asin Department of Health (DOH) nganing matawan nin citation na drug-cleared na an lugar.
Dugang ni Briguel na na-komple kan nasabing banwaan an saro sa mga rekisitos nganing maideklarar na drug-cleared an lugar siring kan pagkakaigwa nin rehabilitation, reformatory asin intervention program sa mga indibidwal na naimbuelto sa paggamit asin pagpabakal nin ilegal na droga; siring man an iba pang dokumentos na kaipuhang isumiter sa committee.
Alagad tinawan-doon kan opisyal na bako soboot sabihon na pag nadeklara nang drug-cleared an sarong lugar an wara nang droga, kaya dapat mahigot man giraray an pagbantay kan banwaan nin Tiwi sa mga indibidwal na pwedesir na maimbuelto giraray sa iligal na droga.
Mientrastanto, padagos man an saindang kolaborasyon sa PNP asin mga lokal na gobierno nganing maka-komple sa mga rekisitos nganing makabale sa mga drug-cleared na lugar.
