Sienerto kan Iran sa Pilipinas na ligtas na makakaagi an mga barkong may watawat kan Pilipinas, asin gabos nin Filipino seafarers sa Strait of Hormuz, susog sa Department of Foreign Affairs (DFA).
Apektado an nasabing daungan huli sa padagos na giyera sa Gitnang Silangan na nakakaapekto sa pankinabang suplay nin langis.
Susog sa DFA nangyari an kasunduang ini makalihis an phone conversation nina Foreign Affairs Secretary Ma. Theresa P. Lazaro asin Iranian Foreign Minister Seyed Abbas Aragchi.
Sinabi kan ahensya na sienerto kan Iran na tutugutan an ligtas, warang hadlang, asin marikas na pag-agi kan mga barko kan Pilipinas sa nasabing daungan.
Ini an kasunod kan kahagadan kan Pilipinas na ituring bilang “non-hostile country” nganing masierto an ligtas na pag-agi sa Strait of Hormuz, na nagdadara nin haros 20% nin pankinabang langis asin liquefied natural gas.
Susog pa sa ahensya, importante an lakdang na ini ngani maprotehiran an mga seafarers asin masierto an seguridad sa enerhiya kan nacion, urog na halangkaw an presyo kan langis na nag-udyok sa Pilipinas na ideklara ang state of national energy emergency.
Segun ki Palace Press Officer Claire Castro, mainit asin bukas an an nagin pag-oolay sa pagultangan kan duwang panig.
Kaiba man sa pag-oolay si Energy Secretary Sharon Garin asin Iranian Ambassador Yousef Esmaeilzadeh.
Nagkasunod an duwang nacion na iproseso an gabos nin kahagadan kan gobierno sa paagi kan opisyal na diplomatic channels nganing mas maparikas an simbag sa mga ini.
