LEGAZPI CITY- Pinagkakahaditan na magpadagos asin maghaloy pa an kariribukan sa pagultangan kan Estados Unidos, Israel asin Iran.
Segun ki Bicol University Peace Studies Professor Dr. Herbert Rosana sa intrevista kan Bombo Radyo Legazpi na ipagpapahiling kan Iran na igwang continuity sa saindang liderato makalihis magadan sa pambobomba an saindang lider.
Marurumduman na sa presente ipigdesignar ngunyan si Mojtaba Khamenei bilang bagong Supreme Leader kan Iran.
Mawot suboot na maipahiling kan nasabing nacion sa kinaban na kaya nindang magtindog kontra sa mga pagsakyada kan Estados Unidos.
Sa ibong kan nagpapadagos na tensyon, sinabi ni Rosana na an Amerika an bako emosyunal asin nakabase an mga desisyon sa sitwasyon asin mga nangyayari sa ground.
Mantang an Iran an mas naka-focus sa saindan ideyolohiya asin iba an tono kan mga pagtubod.
Nahihiling man kan nasabing propesor na imposible an pigmamawot kan Estados Unidos na magkakaigwa nin pagbabago enkasong magsalida kan an rehime kan Iran, huli ta an nasabing Islamic country suboot an warang oposisyon.
Huli digdi, sinabi ni Rosana na kinakaipuhan man na maghanda kan gobierno kan Pilipinas sa mga posible pang epekto sa nacion kan nagpapadagos na kariribukan.
