LEGAZPI CITY- Pigpapa aksyunan na kan lokal na gobierno kan Legazpi City an tambak nin mga basura na natipon durante kan selebrasyon kan bagong taon.
Segun ki Legazpi City Mayor Alfredo Garbin na pigpapatabang na man an mga eco aid ngani na tulos na mahakot an nasabing mga basura.
Aminado man an alkalde na kulang an mga truck kan lokal na gobierno kaya nagtatarabangan na magin an nagkapirang mga sektor.
Pigta-target kaya na malinigan an mga barangay material recovery facility urog pa ngunyan na balik na sa normal an klase asin laog sa trabaho.
Mientras tanto, pighaygayag ni Mayor Garbin na ngunyan na taon plano kan gobierno na magbakal nin lima hasta sa anom na dump trucks ngani na dae na natatambakan nin mga basura an mga material recovery facilities.
An pondo para sa nasabing plano an maghahali sa national government kaya pig-aasikaso na an mga kinakaipuhan na dokumento.
