LEGAZPI CITY – Warang kasiguraduhan segun sa Department of Social Welfare and Development (DSWD) Bicol kun mapapaabutan pa nin tabang an mga residente na may partially-damaged na harong sa serye kan mga bagyong naglamasa sa rehiyon na kan nakalihis na taon.
Paliwanag ni DSWD Bicol Regional Director Arnel Garcia sa intrevista kan Bombo Radyo Legazpi, dawa pa nagsumiter na nin request, dai man sigurado kun may fondong maibababa dapit digdi.
Prayoridad kaya asin enot nang napaabutan nin tabang an mga may totally damaged na harong.
Validated man an datos na nakuwa kan ahesya hali sa mga lokal na gobierno.
Pagklaripikar pa ni Garcia na solamenteng foodpacks asin kun minsan, cash for work an naitatao sa mga nasa nasabing kategorya.
Sa ibong na lado, igwa man na 18, 000 na foodpacks na nakapreparar an ahensya en caso may mag-abot na raot nin panahon sa rehiyon na pwedeng makaapektar sa Bicol.
