LEGAZPI CITY – Ipig-orgulyo kan Tabaco City Local Government Unit (LGU) an saindang pagigin resipiente kan 2024 Seal of Good Local Governance (SGLG).
Segun kay Tabaco City Mayor Krisel Lagman Luistro sa intrevista kan Bombo Radyo Legazpi na magayon sa pangmati na natawan nin paghonra an saindang LGU nin huli ta aram nindang trinabaho ninda ini nin maray asin matanos.
Pigheras man kaini na nag-agi sinda sa butas nin karayom nganing makuwa sana an trayumpo kan saindang gobyerno mantang nagin padipisilan an requirements asin criteria nin huli ta nagbago kun kaya antisiparan suboot sa sunod na taon na posibleng magbago o may i-dugang sa mga criteria.
Mientrastanto, pigtaram man kan mayora na gagamiton ninda an naresibing incentives na 2 million pesos para sa pagpapakarahay kan mga kaluyahan kan saindang gobyerno nganing maihabol asin makasabay an mga ini sa mga nangengenot na mga departamento sa ciudad.
Pigtawan doon man kaini na dawa sadit an nasabing kantidad, magigin dakulang bagay ini nganing mapaunlad pa an saindang serbisyo sa syudad na papakinabangan man kan saindang mga nasasakupan.
Nagpasalamat man ini sa Department of Interior and Local Government (DILG) nin huli ta pigtabangan sindang maka-comply kan mga kinakaipuhang dokumento nganing makasabay an saindang syudad sa enterong probinsya na may magayon na pamumuno asin sa saindang mga namamanwaan nin huli ta nakisumaro man sinda sa pagpapaotob kan saindang mga mandato.
Pigpromesa man ni Mayor Krisel sa masunod na magigin mayor kan Tabaco City na mga matitibay asin well-trained an ipapamana niyang team nganing maipadagos an winning streak kan syudad sa SGLG award.
