LEGAZPI CITY- Bagsak sa karsel an sarong lalaki na suspek sa panghahabon sa syudad nin Tabaco makalihis na iusip kan sarong barangay official na pigsublian niya nin tools nganing buksan an hinabasan na behikulo.
Nabisto an suspek na si Richard Taniela Sartin 28 anyos, asin residente kan Barangay Tilis, Bato, Catanduanes.
Inot kaini, nagrani sa hepatura kan Tabaco City Police Station an biktima na si Alex Pete Bien Bagasala 38 anyos, makalihis na mawara suboot an saiyang motorsiklo na ipig-park sana sa Barangay Quinale kan Tabaco.
Tulos man na pigtaong aram kan nasabing estasyon an manungod sa insidente sa iba pang mga hepatura kan kapulisan nganing marikas na mabisto asin maarestar an may kagibohan kan krimen.
Hasta sa sarong Barangay Kagawad na si Rolando Biñas kan Sta. Teresa, Malilipot an nagrani sa kapulisan nganing e-report an saro suboot na kahina-hinalang lalaki na may darang motor na warang susi.
Segun kay Biñas nanubli pa suboot nin gamit an suspek sa saiya nganing mabuksan an tool box kan nasabing motor.
Digdi na nag-abot an kapulisan asin positibong napag-araman na an motor na dara kan suspek an inot ng nae-report na nawawarang behikulo.
Tulos na idinara sa hepatura kan Tabaco CPS an suspek asin sa ngunyan an ipigpepreparar na an saiyang kasong kakahampangon.
