LEGAZPI CITY — Nagbilog na nin Station Investigation Task Group an Sorsogon City Police para sa ikakadakop kan suspetsado sa pambabadil-gadan ki Sorsogon 1st District Board Member Pedro “Peter” Ravanilla.
Sigon ki Sorsogon PNP Provincial Director PS/Supt. Ronaldo Cabral, compuesto an task group nin manlaen-laen na investigating units na magkakasararo para sa marikas na pagtao nin hutisya sa pagkagadan kan bokal.
Kan nakalihis na semana, naidisignar na suboot sa mga ini an saindang magigin trabaho.
Apwera digdi, sinabi man ni Cabral na kabale sa tinawanan nin papel sa kaso an crime laboratory.
Saro pa sa magayon na progreso an pagkakaigwa na nin cartographic sketch kan suspek na 95% suboot an likeness o pagkakapareho sa pandok kan dae pa nabibistong gunman.
Dugang pa kan opisyal, igwa na sindang pighihiling na anggulo sa pambabadil alagad nagsayuma muna ining ibuyagyag sa media an kumpletong detalyes.
Kung babalikan, Martes Santo kan paputukan nin tulong beses si Ravanilla kan nakaolay nya pang suspek sa hampangan kan saiyang pigpapairahay na establisyemiento sa Barangay Pangpang, syudad kan Sorsogon.
