LEGAZPI CITY—Arestado sa sarong hot-pursuit operation kan mga kapulisan an sarong lalaking suspek sa pananaksak sa Barangay Gaba sa banwaan kan Rapu-Rapu, Albay.
Segun ki Rapu Rapu Municipal Police Station Chief of Police Police Major Joseph Melitante, sa intrevista kan Bombo Radyo Legazpi, binisto an biktima na si alyas “Joe” asin an suspek na si alyas “Eddie” na pararehong residente kan nasabing lugar.
Bigla suboot na inatake kan suspek an biktima mantang ini nagkukua nin mga containers nin tubig sa lugar kun saen naiwasan man suboot kan biktima an nagkapirang pag-atake nin pananaksak kan suspek.
Tuminakas suboot an suspek sa insidente kun saen tulos man ninda ining inimbestigaran asin nagkundusir nin hot-pursuit operation kaiba an sarong witness nganing maarestar an nasabing indibidwal.
Naglunad nin motorsiklo an mga otoridad makalihis na makaabot sa isla sa sarong barangay nganing mahanap an lokasyon kan suspek.
Digdi na positibong binisto kan witness an suspek asin segun sa salaysay kan opisyal na natakot ini kaya duminolag sa insidente.
Basado man sa inisyal na imbestigasyon kan saindang kapulisan asin pahayag kan biktima na selos suboot an rason kan pananaksak kan suspek huli sa may gusto suboot ini sa kinakasama kan biktima asin pinili suboot kan babae iyo an biktima.
Segun man sa pahayag kan suspek na an motibo kan saiyang pananaksak an huli sa sarong nakalihis na pangyayari o personal na dagit kun saen an agom kan kinakasama kan babae an namaaram nang tugang kan suspek—kun kaya posible suboot na balak kaining magbalos sa biktima.
Mientrastanto, nagsapo man an biktima nin lugad sa manlaen-laen parte kan saiyang hawak asin tulos na dinara sa ospital para sa medilkal na atensyon.
Posible man na mahampang an suspek sa kasong attempted homicide.
Mensahe man kan opisyal na pirmeng magin alerto asin nakabantay sa kapalibotan, siring man na dae maglakaw na solo sa mga madidiklom na lugar asin dae basta-basta makipag-olay sa iba orog na kun dae bistado.
Pangapodan man niya sa mga barangay officials na kun pwedesir na mag-invest sa CCTV camera sa saindang lugar nganing makatabang sa imbestigasyon asin marespondehan tulos kan mga otoridad en kaso may manutarang mga siring na insidente.
