Suspek sa mga insidente kan basag-kotse sa Legazpi City, napasakamot na kan otoridad

LEGAZPI CITY – Karsel an bagsak an suspetsadong pigtuturo na nasa likod kan mga insidente kan basag kotse sa ciudad nin Legazpi City.

Segun Legazpi City Mayor Alfredo Garbin sa Intrevista kan Bombo Radyo Legazpi na binisto an suspetsado na si alyas “Jay”, 22 anyos, asin residente kan Barangay Tamaoyan kan kaparehong ciudad.

Susog sa itinaong impormasyon saiya kan Legazpi City Police Station, na nadakop sa akto an suspetsado nagpapasa nin salming kan kotse kan nakaaging aldaw.

Mantang pigsasagibo an pag-arestar sa suspetsado an pigsaksak kaini an duwang pulis kun sain nagsapo nin malalang lugad an saro sa mga ini.

Pig-omaw man kaini an marikas na aksyon kan kapulisan nganing maswata an mga siring kaining insidente sa ciudad.

Piglalaoman ninda na sa pagkakakulong kan suspetsado an dae na ini mauutro sa Legazpi an mga insidente nin basag kotse.

Sa presente, nagpaparahay na an mga nasaksak na pulis asin nasa maray nang kamugtakan.

Pagsyerto ni Mayor Garbin sa publiko na gigibuhon ninda an gabos na lakdang nganing dae na mautro pa an insidente kan basag kotse sa ciudad nin Legazpi.