LEGAZPI CITY — Suicide an nagluluwas na ikinagadan kan 13-anyos na lalaking joven na nadukayang gadan sa Barangay Basicao Interior sa banwaan kan Pio Duran.
Susog ini sa isinagibong otopsiya sa bangkay kan biktima na pinangenotan ni Dr. Raul Alcantara, medico-legal officer kan National Bureau of Investigation (NBI) Bicol.
Enot na nagbutwa an mga impormasyon na garo pa-duyan ining iginakod sa kahoy alagad sigon ki Dr. Alcantara, dae man sya nin nahiling na “ligature mark” sa bitis asin kamot kan biktima.
Klinaro man kaini na bako man pinasuan an nahiling na kolor itom sa bitis kan joven alagad dugong natipon huli sa pirang aldaw na pagkakabitay.
Bako man suboot totoo na hinali an mga lamang loob kaini huli ta posibleng tinuktukan man sana nin mga bayong an tulak kun kaya naluho.
Sierto an doktor na kumpleto an internal organs kan biktima na nagsaradit huli ta nasa advance stage of decomposition na kan madukayan an hawak kaini.
Sa ibong kan nagunong impormasyon sa paagi kan otopsiya, sinabi ni Alcantara na an mga imbestigador man giraray kan kaso an matao nin konklusyon kun ano an talagang kawsa kan pagkagadan kan biktima base na man sa magigin resulta kan saindang imbestigasyon.
Kun babalikan, sarong semanang nawara an aki asin nadukayan na sanang wara nang buhay kan saiyang kaparientes.
