LEGAZPI CITY- Pinahimutikan kan Philippine Institute of Volcanology and Seismology (PHIVOLCS) an pagluwas kan sarong artikulo sa Albay na nagsasabing igwang naobserbarang ‘crack’ sa ngimot kan Bulkang Mayon.
Klinaripikar ni PHIVOLCS resident volcanologist Ed Laguerta sa intrevista kan Bombo Radyo Legazpi na bako ‘crack’ kundi resulta kan nangyaring ‘spotter’ o sunod-sunod na lava fountaining kan Enero 23 an nahiling sa bulkan.
Dugang na paliwanag pa ni Laguerta na nagbalik sana sa dating ayos an ngimot kan bulkan antes pa man an makapirang beses na pagputok kaini huli sa lava collapse asin pagdausdos kan lava.
Katakod man kan aktibidad, nahiling man an pagbulos kan pyroclastic materials sa San Antonio channel kan Tabaco City o sa southeast quadrant kan bulkan.
Posible man suboot na naipasala sana an ‘secondary explosion’ o mga pagputok huli sa uran sa pigsasabing crack partikular na sa pagbulos kan lava sa ibabaw.
Mientras tanto, nagpatanid man an ahensya sa pagiging maingat sa paglalatag kan mga impormasyon dapit sa bulkan tangarig na dae magkrear nin undue alarm.
