Sienerto ni Speaker Ferdinand Martin G. Romualdez na magpapadagos an programang P20 kada kilo na bagas ni Presidente Ferdinand “Bongbong” R. Marcos Jr., na inilansar sa Visayas, huli sa piglalaomang paglangkaw kan ani kan paroy dara kan mas pinahigot na suporta kan gobierno sa sektor kan agrikultura.
Ini an inihayag ni Spekaer Romualdez sa sarong intrevista kasabay kan inagurasyon kan Castañas Centro Communal Irrigation System sa Barangay Castañas, Sariaya, Quezon.
Segun ki Speaker Romualdez na dakula an magigin tabang kan mga solar-powered pump irrigation projects (SPIPs) nganing mamantenir an programang P20 kada kilo bigas huli mababawasan kaini an gastos kan mga paraoma asin mapadakol an saindang ani.
Sakop kan proyektong solar irrigation sa Sariaya an 50 ektarya asin nakikinabang digdi an 33 pamilyang paraooma, na ngunyan an may bastante asin dagos-dagos na suplay nin tubig asin dae na kaipuhang maglaom sa mamahalon na diesel pumps.
Huli sa solar irrigation system na ginibo kan National Irrigation Administration (NIA), nakakatipid na an mga paraoma sa Sariaya na pigkakarkulong ₱80,000 kada cropping season.
Tinawan-duon ni Romualdez na sa mga lugar na may solar irrigation gikan sa National Irrigation Administration, naglangkaw an ani kan mga paraoma huli ta nagkakaigwa sinda nin tsansa na makapagtanom nin duwang beses sa sarong taon, kumpara sa dating sarong bes sana.
