LEGAZPI CITY- Kumpiyansa an mga kapulisan sa provincia kan Sorsogon na magigin matrangkilo an pagkokundusir kan paparaning pirilian sa Mayo 12.
Segun ki Sorsogon Police Provincial Office Director Police Col. Alex Daniel sa intrevista kan Bombo Radyo Legazpi na padagos sindang nakasuporta sa gabos na mga aktibidad kan Commission on Elections.
An gabos man na mga political rallies an pigtututukan kan mga kapulisan ngani na magin matrangkilo an pangangampanya kan mga kandidato.
Afuera digdi, sinabi kan opisyal na pigbabantayan man kan mga otoridad an posibleng hiro kan mga rebeldeng grupo.
Sinabi ni Daniel na sa presente wara man na namo-monitor an saindang intelligence unit na anuman na insidente nin permit to campaign asin mga harassment.
Igwa man suboot na mga nareresibeng impormasyon na nagbabalo an nagkapirang grupo na manakot alagad bako man berepikado an nasabing mga impormasyon.
Katakod kaini, sinierto kan opisyal na padagos na naka alerto an saindang pwersa ngani na maibitaran an anuman na dae pinaglalaoman na mga insidente.
