LEGAZPI CITY – Nagtaong fuersa an Pulis Kasanggayahan para sa piggigibong 3-day rally sa Metro Manila na nagpoon ngonian na aldaw November 16 sagkod November 18, 2025.
Segun ki Sorsogon Police Provincial Office Spokesperson Police Major Arwin Destacamento sa intrevista kan Bombo Radyo Legazpi na maabot sa 100 na mga kapulisan an saindang ipinadara nganing magbantay sa gigibuhong aktibidad.
Nagtao man nin kasuguan asin pagirumdom sa mga ipinadarang personahes an saindang provincial director na si Police Colonel Alex Daniel na i-obserbar an operational protocol, ipa-otob an professionalism asin maximum tolerance.
Pigdoon niya man na an saindang ipinadara na dugang fuersa an hale pa sa 1st and 2nd force maneuver platoon kan saindang ofisina asin Provincial headquarter office mantang may mga kabale man na mga police officials nganing magmando.
Pigsyerto man kan opisyal na maski nagpadara sinda nin augmentation support sa Metro Manila an dae man ninda mapapabayaan an provincia asin dae maapektaran an pagtatao ninda nin serbisyo sa publiko.
Afuera sa 3-day rally sa Metro Manila an nakikipagkoordinar na man sinda sa mga lokal na gobierno nganing aramon kun may magsasagibo man nin mga protesta sa saindang provincia nganing matawan ninda ini nin seguridad.
Pagirumdom man ni Destacamento sa mga makondusir nin mga hiro protesta na makipagkoordinar sa mga law enforcement agencies nganing mapa-otob man liwat an pazy orden sa provincia na dae napupugulan an saindang direchos.
