LEGAZPI CITY – Nakaalerto an Sorsogon Provincial Disaster Risk Reduction and Management Council (PDRRMC) sa anuman na magigin kamugtakan kan panahon sa bilog na provincia huli sa epekto kan Bagyong Ineng.
Sa intrevista kan Bombo Radyo Legazpi ki Sorsogon PDRRMC head Engr. Raden Dimaano, dinerihiran na an mga nasasakupang local disaster management councils tangarig na imonitor an mga risk areas.
Segun ki Dimaano, dae man nagrekomenda nin class suspension urog na pabigla-bigla an pag-uran asin minapundo man sana mantang naka-Blue alert man huli sa deklarasyon kan national dengue epidemic.
Afuera kaya sa physical hazards, ipigkokonsiderar man an health hazards kan nasabing raot nin panahon.
Nagtetenir man an close monitoring sa mga salog asin iba pang areas na may huma nin pagbaha asin flash floods partikular na sa mga banwaan kan Donsol asin Pilar na nagsisirbeng upstream asin downstream nin tubig.
Inasegurar kan opisyal na generally prepared an mga oficina mantang bukas an linya kan komunikasyon sa pagresibe nin impormasyon sa anumang insidente na posibleng magbungkaras katakod kan namamatiang raot nin panahon.
