LEGAZPI CITY- Pigkokunsiderar na normal na an sitwasyon sa provincia kan Sorsogon makalihis an nangyaring pagputok kan bulkang Bulusan.
Segun ki Sorsogon Provincial Disaster Risk Reduction and Management Office head Engineer Raden Dimaano sa intrevista kan Bombo Radyo Legazpi na nakabalik na sa saindang harong an mga pamilya na enot na pig-ebakwar makalihis na mapektaran kan abo.
Napag-araman na dakulang tabang man an naeksperyensyahan na mga pag-uran ngani na mahugasan an buminagsak na abo sa mga harong asin mga kahoy.
Sa ibong kaini, sinierto kan opisyal na nagpapadagos an alokasyon kan facemask urog na sa mga komon na naapektaran kan abo.
Nagpapadagos man suboot an tabang na naipapaabot sa mga naapektaran na biktima.
Dugang pa ni Dimaano na nagtetenir man na naka alerto an mga lokal na opisyal ngani na marikas na makapagtaong atensyon enkasong liwat na magkaigwa nin aktibidad an Bulusan volcano.
