LEGAZPI CITY- Nag-alma na an pinakahalangkaw na opisyal sa probinsya kan Catanduanes sa padagos na paggamit nin taramon na “mega” sa nadiskubreng shabu laboratory sa Brgy. Palta Small, Virac, Catanduanes.
Nauyam na suboot si Catanduanes Governor Joseph Cua sa pauru-utrong pagsabi nin “mega” kan mga miyembro kan Philippine National Police (PNP) asin kan nagkapirang kongresista na nagbale sa inquiry dapit sa shabu lab.
Sigon sa gobernador, anom na hydrogenators man sana an nakua digdi alagad naka-stock sa laboratoryo asin dae pa nasi-set up kun kaya pigkukwestyon kaini kun pano maaapod na “mega” ngunyan na bako pa man ini operational.
Mientrastanto, liwat man kaining sinabi na nakakaapektar bako sana sa reputasyon bilang opisyal alagad sa bilog na probinsyang pinamamayuhan an padagos na pag-imbwelto sa saiyang pangaran sa isyu.
Haloy na man suboot nyang ipigbubusol an pag-promote sa island province bilang happy island alagad naraot an local tourism industry kan Catanduanes kan darahon ni Congressman Robert Ace Barbers sa pagdangog sa Kamara an isyu sa shabu laboratory.
