LEGAZPI CITY—Irido an sarong senior citizen makalihis na rinapado ini kan sarong 42-anyos na lalaki nin kahoy na kawayan sa Bagacay, Legazpi City, Albay.
Segun ki Legazpi CPS PIO PEMS Carlos Paña, sa intrevista kan Bombo Radyo Legazpi, na sa saindang imbestigasyon na kan pauli na an senior citizen gikan sa pagkua kan saiyang karabaw nasabatan kaini an suspetsado asin digdi na nangyari an pangrarapado nin kahoy na kawayan saiya.
Sinabi kan opisyal na may tarom an puro kan pangrapadong kahoy na kawayan na nagresulta ngani na malugadan an biktima kun saen tulos man ining dinara sa ospital.
Mantang an suspetsado naarestar na man kan mga otoridad.
Sa presente yaon na ini sa kustodiya kan kapulisan asin posibleng mahampang sa kasong attempted homicide.
Alagad dugang kan opisyal na segun sa mga nagkapirang residentes igwa suboot nin helang sa pag-iisip an suspetsado.
Kun kaya naghagad an piskalya na isairarom ini sa sarong psychiatric test ngani maaraman kun may helang sa pag-iisip, asin matawan nin doctor’s certification kun saen posibleng ma-dismiss an kasong ipisunad laban sa suspetsado.
