Salang pagtitipid kan pondo an saro sa nahihiling na rason ni Senador JV Ejercito kun kaya nagaba an parte kan Cabagan-Sta. Maria Bridge sa Isabela kan Pebrero 27, mantang may nag-agi na truck.
Segun kay Ejercito, sa historya, an magibo suboot talaga kan naunambitang tulay an sarong agency sa Japan.
Enot na tantiya kan gastos kan panahon ni dating Presidente Gloria Macapagal an maabot sa 1.2 billion pesos.
Huli suboot sa kataasan kan pondo asin dae ini maaprubaran an napagdesisyunan na local contractor na sana an magibo.
Giit kan senador, sa kagustuhan na makatipid an mas mapamamahal pa huli ta kapag nasala an doble pa an gastos na mailuluwas kan gobierno.
Afuera digdi, saro pang nahihiling na rason kan senador sa pagbagsak kan tulay iyo an mga overloaded truck na dapat mabantayan nganing malikayan an siring kaining pangyayari.
Mientrastanto, sinabi ni Senate President Francis “Chiz” Escudero na dapat Department of public Works and Highways o DPWH na muna an mag-imbestiga kan nangyaring pagbagsak kan tulay sa Isabela.
Segun kay Escudero, dapat mangenot an DPWH Central Office sa pagsisiyasat kun saen sinda suboot an nangangasiwa sa mga government-funded infrastructure projects.
Afuera digdi, sarong bagay man suboot na dapat hilingon iyo an loading capacity kan mga truck na nag-aagi sa tulay.
Enot nang sinabi ni Senate Committee on Public Works Chairman Senador Ramon “Bong” Revilla Jr., na handa siyang dangugon an resolusyon na obhetong imbestigaran an mga insidente kan pagbagsak kan tulay sa manlain-laing parte kan nacion.
Ipigsunad ni Senate Minority Leader Koko Pimentel an Senate Resolution 1319 nganing imbestigaran an mga insidente kan pagbagsak kan mga tulay arug kan Cabagan-Santa Maria Bridge sa Isabela Magapi Bridge sa Balete, Batangas kan October 28, 2024, Bantilan Bridge kan October 29, 2022 asin kadakol pang iba.
