Mawot na maaraman kan Senado an kompletong detalye kan nangyaring insidente sa Ayungin Shoal na nagresulta sa pagkalugad kan pitong miyembro kan Philippine Navy.
Katakod ini kan nangyaring panghaharang, pangbabangga asin pangungulog kan mga Chinese sa mga suldado kan Pilipinas na magdadara kuta nin suplay sa BRP Sierra Madre.
Segun kay Senate President Francis Escudero, nakikipagkoordinar na sinda sa Department of Foreign Affairs ngani na mahagadan nin “full briefing” sa insidente.
Nangapudan naman si Escudero sa ahensya na apwera sa pagpapaabot nin diplomatic protest an mag-isip naman nin bagong paagi ngani na maipaabot an pagkadismaya sa mga piggigibo kan China.
Inabisohan man kaini an Armed Forces of the Philippines na maghanap naman nin ibang paagi sa pagpapadara nin suplay sa BRP Sierra Madre na yaon sa Ayungin Shoal ngani na maibitaran na an mga siring na insidente.
Mientras tanto, dae pa man nin pigpapaluwas na pahayag si Presidente Ferdinand Bongbong Marcos Jr. manungod sa nasabing insidente.
