Pinahimutikan ni Senador Rodante Marcoleta na siya an nagseserbi bilang abogado ni Curlee asin Sara Discaya, kontra sa dakul na mga komentaryo na siya an nagtatabang sa mag-agom, kasunod kan serye kan hearing kan Senate Blue Ribbon Committee dapit sa flood control scandal.
Sa sarong entrevista, sinabi ni Marcoleta na pigkukuwestyon sana niya an paggamit kan restitusyon bilang rekisito sa pag-ako sa Witness Protection Program (WPP).
Segun ki Marcoleta, nagluluwas na piggagamit kan Department of Justice an restitution ngani na limitaran kun sisay an pwedeng mapili na mapasairarom sa WPP.
Nanindugan an mambabatas na dae kinakaipuhan an restitusyon kun an sarong indibidwal an nag-aaplay pa sana asin saka sana magkakaigwa nin civil indemnity o compensation oras na magkaigwa nin desisyon an korte.
Pigkakahandalan ni Marcoleta na ipirit kan DOJ na pagbayadon an mga personalidad na gustong maging state witness na magdadara nin corruption, huli ta wara suboot ini sa ley.
Segun pa sa Senador, dae niya pigdedepensahan an mag-agom na Discaya sa pagkwestyon kan restitusyon.
Nagkataon sana suboot na an mag-agom na contractor iyo an enot na nag-apply sa WPP asin sa pagpoon pa sana, pigpipirit na ni dating DOJ Sec. Jesus Crispin Remulla na ibalik ngona an saindang mga ‘hinabon’ na kwarta, bagay na sabi niya dae pigtutugutan kan ley.
Nanindugan an Senador na an WPP dapat para sa gabos na kwalipikado na testigo na boluntad na matabang sa gobyerno.
