LEGAZPI CITY-Nanindugan si Senador Rodante Marcoleta na pwedisir pa niyang gibuhon an saiyang mga trabaho bilang sarong senator-judge sa impeachment court—kabali na an pagboto asin pag-file nin manifestations—sa ibong kan pagkakulong sa New Quezon City Jail.
Sa sarong surat na ipinadara ki Senate President Win Gatchalian asin ki Presiding Officer Chiz Escudero, si Marcoleta nagsumiter nin duwang manipestasyon kun sain an saro nagpahayag nin pagtutol sa pagdesignar ki Escudero bilang presiding officer, asin an saro nagsusuporta sa pagmantenir kan 16-votes na kahagadan para sa conviction sa paglilitis sa impeachment.
Segun ki Marcoleta, warang nakakaulang sa saiyang legal na kapasidad na magboto bilang senator-judge, huli ta dae siya nakasairarom sa preventive suspension.
Siya presenteng nakadetene huli sa sarong kasong plunder na imbuelto an sarong donasyon na naresibe niya bago an 2022 eleksyon.
Mientrastanto, padagos an deliberasyon kan impeachment court sa voting threshold makalihis na itaas ni Senador Erwin Tulfo an posibilidad na “acquittal by default” enkaso mabawasan an bilang kan mga kwalipikadong senato-judges.
An korte nag-imbitar na nin apat na retiradong huwes kan Korte Suprema na magserbing amici curiae asin magao nin mga ekspertong opinyon sa bagay na ini.
