LEGAZPI CITY- Naglalatag ngunyan nin mga lakdang an mga eskwelahan sa rehiyong Bicol ngani na maibitaran an negatibong epekto kan matinding init kan panahon sa mga estudyante.
Segun ki Department of Education Bicol Spokesperson Mayflor Jumamil sa intrevista kan Bombo Radyo Legazpi na pigpapasierto sa mga schools division offices na well-ventilated an mga classrooms asin igwang inumon na tubig ngani na mabawan an epekto kan halangkaw na heat index.
Napag-araman na pigtatawan man nin poder an mga school heads ngani na magsuspendir kan in-person classes kun nahihiling na kinakaipuhan ini.
Igwa man suboot na mga eskwelahan na nagpa plano na magpaotob nin adjustment sa school hours ngani na maibitaran na mababad sa matinding init kan panahon an mga jovenes.
Sinierto man kan opisyal na an anuman na mga estratehiya kan mga school heads an ipapaaram sa mga magurang ngani na magin preparado man an mga ini.
