LEGAZPI CITY – Pigdisposed kan mga personahes kan National Meat Inspection Service an sarong tonelada nin expired na breast chiken fillet na gikan sa China sa Brgy. Imalnod, Legazpi City.
Segun ki NMIS Bicol Regional Director Dr. Alex Templonuevo sa intrevista kan Bombo Radyo Legazpi na hale ini sa sarong accredited cold storages sa rehiyon an mga karne na saindang pig condemned asin piglubong.
Dae man suboot malilikayan an mga siring kaining aksyon urog na kun mga expire na an mga karne na naka-imbak sa mga pasilidad asin dae na pwedeng ipabakal sa mekado.
Pigdugang man kaini na bawal an mga poultry products na gikan sa China nin huli sa importation ban na pigpapaotob mapadapit sa huma kan highly pathogenic Avian Influenza sa naunambitang nacion.
Pigtaram pa kan opisyal na dae man matatawan an planta nin bayolasyon nin huli ta dae man ini naipabakal sa mga pampublikong merkado.
Saksi suboot sa pagtalbong kan mga produkto an kagsadiri kan Planta, Meat Import and Export division, asin Plant officer mantang nakaresibi man an kagsadiri kan pasilidad nin condemnation slip na parte kan saindang provisions na piggigibo.
Pigdoon man kaini an dakulang huma sa salud an dara kan mga poultry products na raot na urog na kun makakaluwas ini sa pampublikong merkado asin makakaon kan publiko partikular na sa food poisoning, bacterial infection asin iba pa.
Pagirumdom ni Templonuevo sa mga konsyumer na permihang hilingon an safety features kan mga meat products asin isumbong sa local government an mga kaduda-dudang mga karne.
