LEGAZPI CITY- Pigkokondinar ngunian kan 9th Infantry Division Philippine Army an nangyaring pananambang kan New Peoples Army sa miembro kan AFP na nagresulta sa pagkagadan kan sarong suldado sa Bulan Sorsogon.
Segun kay Maj. Frank Roldan, an DPAO Chief, 9th Infantry Division, Phil Army sa intrevista kan Bombo Radyo Legazpi naidalagan pa kuta sa ospital si CPL Rodel Felismino makalihis an insidente alagad tulos man ining binawian nin buhay.
Kun babalikan, nairehistro an ambush incident kasuudma alas 10:45 nin pagka aga sa Barangay Calpi, Bulan, Sorsogon kun saen mantang sakay kan motorsiklo an nasabing biktima an inambush ini kan mga pinagtutubudang NPA sa nasabing lugar.
Mientrastanto, saro pa sa pigkokondinar kan nasabing otoridad an pag ambush kan NPA harani sa mga kaharungan kun saen nagkawsa nin pagkatakot kan mga nasa komunidad.
Kamawotan man kan ahensya na matawan nin hustisya an pagkagadan kan nasabing suldado asin pig-asigurar kaini na maninimbag sa batas an may gibo kan nasabing krimen.
Pigsierto man kaini na mamamantinir man liwat an mga kasuldaduhan sa saindang misyon kun saen dae suboot magiging ulang an pagkawara kan saindang kaibanan.
