LEGAZPI CITY-Sinuntok asin sinipa kan sarong incumbent official an referee makalihis na apudan ini nin foul mantang nasa katahawan kan basketball league sa Sorsogon.
An nasabing opisyal desididong sangatan nin kasong administratibo kan Samahang Basketball ng Pilipinas Bicol huli sa saiyang naging aksyon kun sain nagsapo nin lugad sa pandok an nabanggit na referee.
Segun kay FIBA Commissioner SBP Bicol Technical Academy Head Emmanuel Faraon, sa intrevista kan Bombo Radyo Legazpi, na naipadara na sainda an report asin ma-file nin criminal complaint laban sa perpetrator sa Department of the Interior and Local Government huli sa bako dapat siring kaini an aksyon kan sarong elective barangay official.
May mga dati nang record suboot an nabanggit na opisyal, kun sain tinawan doon kan asosasyon na desidido sindang sangatan nin ini nin kaso asin ipapataw an “life time ban” sa anumang partisipasyon sa maski anong basketball tournament kan asosasyon.
Piglinaw man kan opisyal na pigsasagibo ninda an dapat asin tamang gibuhon, magin kun an referee man an may sala alagad dai suboot nin direchos an sisay man na mangulog nin kapwa.
Pagirumdom kan opisyal sa mga referee, na i-maximize asin protehiran an saindang mga sadiri, mag-training, asin mag-antendir sa mga seminars, huli ta “very prone” sa pagkakamali asin kritisismo an saindang trabaho.
