LEGAZPI CITY-Naarestar an sarong negosyante sa ciudad kan Legazpi huli sa pangingikil sa mga aplikante kan Bureau of Fire Protection (BFP) Bicol.
Segun kay BFP Bicol Regional Director Fire Senior Superintendent Dr. Achilles Santiago, sa intrevista kan Bombo Radyo Legazpi, nanotaran ninda an suspek huli sa nakipagkoordinar an biktima sa mismong ahensiya kan BFP.
An suspek na bisto sa alyas na “Liezel” na kung sain pighahagadan an biktima nin nasa P235,000 para sa suboot na pagapply sa ahensiya.
Naarestar ini huli sa isinagibong entrapment operation kan ahensiya sa Legazpi, kung sain nakipag-negosasyon an biktima katuwang an mga otoridad.
Dagdag pa ni Santiago na daing koneksyon sa saindang ahensiya o kamag-anak sa opisina an suspek.
Mahahampang an suspek sa kasong Robbery extortion.
Basado man sa imbestigasyon kan ahensiya na kadakol na biktima kan pangingikil sa Masbate kung sain mas dakol an aplikante asin mawot na makapagtrabaho sa ahensiya.
Abiso man kan opisyal sa publiko na nagkapirang requirements man sana an pighahagad kan ahensiya sa pagproseso kan anuman na transaksiyon, saro na digdi an medical, dental, neuro asin drug test.
Nagpatanid man an ahensiya na tulos na makipagkoordinar sa ahensiya enkaso magkaigwa nin parehong insidente.
Mientrastanto, padagos man an mga pigpapaotob na programa kan ahensiya siring kan modernization program, integrity monitoring, re-engineering, online transactions, asin strategic positioning.
