LEGAZPI CITY – Nagsagin sagin an sarong menor de edad na babayi sa provincia kan Sorsogon na biktima suboot ini nin gang rape nganing dae madagitan kan saiyang magurang.
Segun kay Sorsogon Police Provincial Office Spokesperson Police Major Arwin Destacamento sa intrevista kan Bombo Radyo Legazpi na ginamit ining rason kan babayi nganing matakpan an pag-gala kaini kaiba an saiyang barkada nin pirang aldaw.
Nagsagibo nin imbistigasyon mapadapit sa isyu asin napag-araman na warang basehan na nagkaigwa nin gang rape asin imbento sana suboot kan biktima an nasabing mga alegasyon.
Pigsuri nin maray kan saindang operatiba asin napag-araman na dae nagtutugma an salaysay kan babayi asin kan saindang naguno na mga impormasyon asin ebidensya.
Pigtaram pa kan opisyal na makalihis na isinagibo an imbistigasyon, ipigtuga kan babayi na gibo gibo niya sana an nangyaring gang rape saiya.
Ginibo ninda an pagsusuri asin imbistigasyon nganing magkaigwa nin opisyal na pahayag nganing mainformar an publiko na warang katotohanan an naunambitang isyu.
Huli man ta napost kan dae na binistong media practitioner an nasabing insidente sa social media asin dae naireport sa saindang opisina manungod sa gang rape issue, nagkawsa ini nin kalibungan asin kahandalan sa publiko sa saindang provincia.
Pigtawan doon ni Destacamento na kaipuhan nguna aramon kan mga media practitioner an gabos na detalye nganing dae magkawsa nin kahandalanan partikular na sa mga nakakabasa kaini sa social media.
Sa presente nakikipagkoordinar na sinda sa saindang legal council nganing dae na mautro pa an pagpapaluwas nin mga siring kaining fake news.
Abiso kaini sa mga media practioner na syertuhon na may basehan an saindang mga bareta asin magkaigwa nin close coordination sa PNP nganing dae magkawsa nin pagkahandal sa publiko mapadapit sa mga gibo gibong isyu.
Pangapodan kan opisyal sa publiko na dae tulos magtubod sa mga nagruruluwasan sa social media asin permihan na mag-antabay sa saindang social media page nganing maaraman kun ano an mga napapanahong issue sa provincia kan Sorsogon.
