LEGAZPI CITY – Pinagsasaksak hasta sa magadan an sarong maestro sa Senior High School kan Tabaco National High School.
Binisto an biktima na si Jordan Averilla, 40 anyos, asin residente kan Purok 3, Baranghawon sa syudad kan Tabaco.
Dating nagtuturo si Averilla nin Ethics sa Aquinas University of Legazpi asin dati man na seminarista.
Base sa ipinaluwas na impormasyon kan pulisya, nagsapar nin tama an biktima sa saiyang daghan gamit an sarong kutsilyo.
Nahiling man an senyales na nagsapar man nin injury an saiyang dila na posibleng indikasyon na binago ini sa may ngimot.
Nakahagad pa man suboot nin tabang an biktima sa saiyang kataraid makalihis an insidente.
Naidara pa an biktima sa ospital alagad ipigdeklarar ng dead on arrival.
Segun sa Tabaco City police, posibleng hinabasan an residencia kan maestro makalihis maaraman na nawawara an wallet kaini.
Segun man sa mga otoridad, naaydentipikar na an suspek alagad dae pa ipapaluwas an pangaran kaini.
Hinagad man kan mga amigo asin parientes kan biktima an hustisya para sa ginadan na maestro.
