LEGAZPI CITY-Nag-labor an sarong bados mantang nasa evacuation center sa Barangay Nasisi sa ciudad kan Ligao sa Albay.
Segun kay Barangay Nasisi Captain Joevelyn Rodriguez, sa intrevista kan Bombo Radyo Legazpi, na kabulanan talaga kaini asin nag-labor ini mantang nasa evacuation center sa saindang barangay.
Nakapagtao man suboot nin asiste an Community Health Officer (CHO) asin tulos man na naidalagan sa ospital an nasa 20 – 30 anyos na bados.
Sa presente, nasa maayos man suboot na kamugtakan an nasabing indibidwal asin nailuwas man nin healthy an saiyang panduwang aki.
Mientrastanto, segun sa kapitan kan Barangay Nasisi na nasa 187 na pamilya o nasa kabilugang 821 na mga indibidwal an an nakapag-ebakwar sa saindang lugar.
Dai man suboot nagkulang an saindang barangay sa pagtatao nin pagkakan huli sa nakapagserbi sinda nin mga hot meals sa mga residente.
Nakapagtao man suboot sinda nin relief goods asin bago magdecamp, pigsierto man suboot ninda na wara nang peligro sa saindang mga lugar.
Dagdag pa kan opisyal na nagin maayos man an saindang sitwasyon huli sa well-coordinated sinda sa mga ahensya asin wara man nin masyadong danyos sa mga kaharongan o pagbabaha sa saindang lugar.
Mensahe man kan kapitan sa mga residente na magsunod sa mga abiso sa ciudad asin konseho huli sa kahagadan ninda an kaligtasan kan kada saro.
