LEGAZPI CITY — Dead on arrival an pasahero kan sarong kotse makalihis mabangga sa sarong dump truck sa Brgy Binitayan banwaan kan Daraga.
Napag-araman na hale an kotse sa banwaan kan Camalig pasiring sa syudad kan Legazpi na pigmamanehar ni Jose Dominguez Jr asin lunad an pasaherong si Gina kan makabangga an truck.
Pigmamaneho man ni Ronald dela Torre kan Brgy San Pedro, Sta Elena, Camarines Norte an truck na pigbabaybay an kalabaan kan Lakandula Drive sa nasabing barangay pasiring sa Camalig.
Tulos man na idinalagan sa Bicol Regional Training and Teaching Hospital (BRTTH) si Dominguez asin nasa irarom ngunyan nin medikasyon mantang dae na nakasalbar pa an kaiba kaini.
Nasa kustodiya naman kan Daraga Municipal Police an driver kan truck para sa magkakanigong disposisyon.
