LEGAZPI CITY- Nasayang an sako-sakong mga bagas asin iba pang mga relief goods na ipapadara kuta sa Barangay Sagurong makalihis na maglubog an bangkang piglulunadan kaini mantang nasa katahawan kan kadagatan na sakop kan ciudad nin Tabaco.
Sa intrevista kan Bombo Radyo Legazpi kay Kapitan Saeed Amhed Tanggo kan Barangay Rawis, nakaresibe sinda nin apod hali sa mga lunad kan nasabing bangka na naghahagad na marescue makalihis na maluho an sakayang pandagat kan makabangga sa dakulang kahoy na pig-aanod sa dagat.
Tulos man na nagpadara an kapitan nin apat na bangka ngani na i-rescue an tolong tripolante asin marekober pa an pigbabiyahe kaining mga relief goods.
Alagad huri na, huli ta nadumog na asin dae na mapakinabangan pa an nasa 30 sako nin bagas, mga asukar, bihon asin iba pang mga relief goods.
Segun kay Kapitan Saeed, solamenteng an mga sachet nin kape, gatas, instant noodles asin mga de lata na sana an narekober asin napapakinabangan pa na dinara sa baybayon kan mga rescuers.
Napag-araman na hali pa an mga nasabing relief goods sa Manila na donasyon ni Senador Kiko Pangilinan asin ipapadara kuta sa Barangay Sagurong kan ciudad nin Tabaco na saro sa labing naapektaran kan mga nag-aging bagyo sa Albay.
Kan kinasunodan na aldaw, pinadara man kan kapitan an mga naisalbar na mga relief goods sa barangay na benipisyaryo kaini.
Mientras tanto, nagpromesa naman si Senador Pangilinan na riribayan an nasa 30 sako nin bagas asin ipapadara liwat sa mga residentes kan Barangay sagurong.
