LEGAZPI CITY-Pigbubusol ngonian ni Senator Robin Padilla an tulos na pagpasar kan Senate Bill No. 617 o an propwestong “Reserve Officers’ Training Corps (ROTC) Act” kan Biyernes, Hunyo 12, kasabay kan pagselebrar kan ika-128 na “Araw ng Kalayaan” sa Pilipinas.
Segun kay, Padilla, mas orog na pigpapahiling kan nangyaring magnitude 7.8 na pagyugo sa Mindanao an pangangaipo para sa mas matatag na paghahanda kan mga namamanwaan sa panahon kan sakuna.
Sa sarong pahayag, sinabi kan senador na obheto kan propwesto na mahubog an mga jovenes na magin disiplinado, makabayan, asin handang tumugon sa mga angat kan nacion, kaiba na an mga kalamidad asin orolay mapadapit sa pangseguridad.
Tinawan doon man niya na an seguridad kan nacion, bako sana pag-abot sa mga banta hale sa luwas kan nacion, kundi sa kahandaan sa mga natural na kalamidad.
Sa irarom kan propwesto, katuyuhan kaini na i-institutionalize asin pakusugon an programa kan ROTC sa Higher Education Institutions (HEIs) asin Technical-Vocational Institutions (TVIs) sa bilog na nacion.
Kaiba digdi an pagsasanay sa mga survival skills, disaster response operations, search-and-rescue missions, relief operations, asin iba pang mga abilidad na importante sa panahon kan mga kalamidad asin humanitarian na mga emerhensya.
