Isasagibo an Rite of Sealing sa kabaong kan namaaram na lider kan Simbahang Katolika na si Pope Francis taodtaod na alas-8:00 ng banggi ngonian na Biyernes, Abril 25 oras sa Vatican o alas-2:00 nin maagahon kan Sabado, Abril 26 sa Pilipinas.
Idaraos ini sa isasagibong liturgical rite na papangenotan kan Camerlengo kan Holy Roman Catholic Church na si Cardinal Kevin Farrell sa St. Peter’s Basilica kun saen nakalagak an labi ni Pope Francis.
Aatendiran man ini kan pirang Cardinals asin mga opisyal kan Holy See.
Pighagad man kan Office for the Liturgical Celebrations an presensiya ninda Cardinals Giovanni Battista Re, Pietro Parolin, Roger Mahony, Domenique Mamberti, Mauro Gambetti, Baldassare Reina, asin Konrad Krajewski sa isasagibong Rite of Sealing kan kabaong ni Pope Francis.
Kabale man sa maga-assist sa nasabing seremoniya sinda Archbishop Edgar Peña Parra, Archbishop Ilson de Jesus Montanari, Monsignor Leonardo Sapienza, Canons of the Vatican Chapter, Ordinary Minor Penitentiaries of the Vatican, an secretaries ni Pope Francis, asin iba pang in-admit kan Master of Pontifical Liturgical Celebrations na si Archbishop Diego Ravelli.
An nasabing liturgical rite man an marka kan pagtatapos kan public viewing sa St. Peter’s Basilica, kun saen labi 90,000 katawo an nagtaong honra sa huring sandali sa namaaram na Santo Papa.
Mientrastanto, isasagibo an funeral mass para sa namaaram na Santo Papa bukas, aldaw nin Sabado, Abril 26 sa oras na alas-10:00 nin aga sa St. Peter’s Square o alas-4:00 nin hapon kan Sabado, oras sa Pilipinas.
