LEGAZPI CITY- Gadan na kan idalagan sa ospital an suspek siring man an biktima makalihis an insidente nin pananaksak asin pambabadil sa Purok 7 Brgy. Inamnam Pequeño, banwaan kan Guinobatan.
Sa imbestigasyon kan Guinobatan Municipal Police Station, pauli sa saiyang harong an biktimang si Apollo Pallan, 58-anyos na retiradong soldado asin residente kan nasambitan na lugar gikan sa terminal kan bus ngani na iatod an saiyang aki na byaheng Manila para sa trabaho sa abroad kan bigla na sanang pagsasaksakon kan suspek na binistong si Reynato Nares, 38-anyos, public school teacher asin residente kan parehong barangay.
Lugad sa walang bitis asin walang kamot an nagin tama kan biktima na kagibuhan man sana kan saiyang sadiring amigo asin kapitbahay na si Nares.
Makalihis an pananaksak, nakadangog an testigong si Joel Trinidad nin 3 magkakasunod na putok nin badil asin pagkatapos, nagluwas an esposa kan biktima na si Edna Pallan na naghahagad nin tabang na darahon sa ospital an saiyang esposo na nagkakarigos na sa sadiring dugo.
Alagad napag-araman na nakabalos si Pallan asin pinagbabadil si Nares na nahiling man na duguan sa lugar kan insidente.
Narekober sa crime scene an 12-pulgadang kutsilyo mantang dae man nin nadiskubreng badil o basyo nin bala.
Pigsasabing dagit an motibo kan paratukdo sa retiradong soldado.
Pirmi kaya suboot na napapastidyo si Pallan sa presensya kan mga kaduda-dudang indibidwal na nagluluwas-laog sa harong ni Nares tuyong banggi.
Napag-araman man na nagin subject na an suspek kan Oplan Tokhang alagad nagsayumang magsurindir sa pulisya.
Palaisipan ngunyan kun nata dae nin narekober na badil o basyo nin bala sa crime scene ngunyan na iyo an ikinagadan kan suspek.
