LEGAZPI CITY- Ikinaugma kan Commission on Elections an pag-aprobitsar kan nagkapirang mga namamanwaan sa register anywhere program kan ahensya.
Ipigkokundusir kaya an nasabing register anywhere program sa ciudad kan Legazpi kada enot na Sabado kan kada bulan.
Segun ki Albay Provincial Election Supervisor Atty. Maria Aurea Bo-Bunao sa intrevista kan Bombo Radyo Legazpi na saro sa mga nag-aprobitsar kan programa an sarong residente kan Tawi-Tawi na mawot na magpa transfer kan saiyang mga datos sa Donsol, Sorsogon.
Pag-istorya kan opisyal na labi an kaugmahan kan nasabing persona huli ta dae na niya kaipuhan na magbiyahe pasiring sa Tawi-Tawi o sa Donsol ngani na mailipat an saiyang records.
Katakod kaini, nangapidan man si Bo-Bunao sa publiko na aprobitsaran an nasabing programa ngani na mas madaling makapagparehistro antes pa man an pirilian sa masunod na taon.
Mientras tanto, bukas man an ahensya na magkondusir nin mga special satellite registration kun nagkakaigwa nin request an mga ahensya de gobierno o mga pribadong organisasyon.
