Nagsunad nin petisyon sa Korte Suprema ngonian na aldaw si Mamamayang Liberal Party-list Rep. Leila De Lima asin Caloocan 2nd District Rep. Edgar Erice.
Nagsunad sinda nin ‘petition for certiorari and prohibition’ laban sa mga ‘unprogrammed appropriations’ kan 2026 General Appropriations Act.
Segun ki Rep. Leila De Lima, an petisyon an nganing kwestyunon an legalidad o konstitusyonalidad kan ‘unprogrammed funds’ sa national budget ngonian na taon.
Pagdoon kan petitioner na kulang an veto ni Presidente Ferdinand ‘Bongbong’ Marcos Jr. na 92.5 billion pesos sa budget.
Igwa pa suboot nin natatada sa inaapod na unprogrammed funds, na nagkakantidad nin 150 billion pesos na kabali sa 2026 national budget.
Huli kaini, segun sa petisyon na isinangat sa Korte Suprema, mawot suboot kaini na linawon kan korte an legalidad kan pagkakaigwa nin ‘unprogrammed appropriations’.
Nagtutubod siya na dae ini dapat ibali sa General Appropriations Act o sa national budget kan Pilipinas.
Katakod sa petisyon an kahagadan na mag-isyu an Korte Suprema nin Temporary Restraining Order asin Writ of Preliminary Injuntion, Status Quo Ante Order nganing mapundo an implementasyon kan ‘unprogrammed funds’.
Huli kaini, orog pang ipinaliwanag kan mambabatas kun nyata dae dapat ilaog sa national budget an arog kaining klase nin pondo.
Ipinahayag man kaini na kun dae maresolberan an isyu dapit sa budget, posibleng magpadagos an pag-abuso sa pondo kan banwaan.
Afuera sa pagpaluwas nin Temporary Restraining Order, hinagad man ninda sa Korte Suprema na ideklarar an Section 14 kan Republic Act No. 1214 o an 2026 General Appropriations Act bilang ‘unconstitutional’, partikularmente an probisyon na nagtutugot sa ‘unprogrammed appropriations’.
