Inireklamo sa National Bureau of Investigation sinda Mamamayang Liberal Party-list Rep. Leila De Lima asin Fr. Flavie Villanueva an 18 dating suldado asin abogadong si Atty. Levito Baligod.
Personal na nagpasiring sa oficina kan kawanihan an lehislador asin padi nganing magsangat nin reklamo.
Partikularmente, nagsangat sinda nin reklamong ‘libel’ asin ‘cyber-libel’ laban sa mga nagpabisto na dating Marines o soldados, asin an saindang abogado na si Atty. Baligod.
Segun ki Rep. Leila de Lima, nagsangat sinda nin reklamo huli sa mga panraraot na pahayag kontra saiya kan mga nabanggit na indibidwal.
Nag-ugat an reklamo sa mga alegasyon na nakapalaog sa joint affidavit kan grupo na nagsasabing nakaresibe suboot nin ‘paper bag’ o maleta na may laog na milyones de pesos na kantidad nin kwarta.
Mahigot niya man na pinahimutikan ini asin ipigkonsiderar ining gabos na sarong ‘kasinungalingan’ na may katuyuhan na raoton an saiyang reputasyon.
Pahayag man ni Fr. Flavie Villanueva na an saindang pagsangat kan reklamo an bilang pagtutol kontra sa mga panraraot na pahayag na ginibo kan grupo.
Mientrastanto, makalihis na magsangat nin reklamo sa National Bureau of Investigation, tulos sindang nagdiretso sa Department of Justice ngani na magsangat nin suway na kaso.
Sa departamento, nagsangat sinda nin ‘reklamong perjury’ laban sa 18 dating soldados na nagpirma sa ‘joint-affidavit’ na dai pa sana nahahaloy an isinumiter sa Office of the Ombudsman.
Ikinonsidera ni Rep. De Lima na kautikan an alegasyon na nagkaigwa siya nin pag-oolay kay former House of Representatives Speaker Martin Romualdez.
Liwat man kaini na pinahimutikan an alegasyon na nakaresibe siya nin ‘paper bag’ na nabuyagyag sa ‘report’ kan grupo.
