LEGAZPI CITY – Nanindugan an sarong kongresista na dae siya nagkakawat nin online sabong sa saiyang cellphone sa kasagsagan kan session sa House of Representatives.
Segun ki AGAP Partylist Rep. Nicanor Briones sa intrevista kan Bombo Radyo Legazpi na makamundo huli ta nadawit siya sa dakulang isyu alagad naghagad siya nin pasensya sa publiko.
Paglinaw niya na pighiling niya man sana an pigsend saiyang video kan atamang manok kan saiyang kamag-anak asin wara ining tari kun kaya dae ini maaapod na sabong.
Inimbitaran man siya kan nagsend kan video alagad dae niya ini tinanggap huli ta dae man siya naglalaog sa bulangan.
Siring man kan paghagad kan opisyal nin dispensa sa pagkakadamay kan House of Representatives an pigpapatawad niya na man an nagkuwa kan video maski labag ini sa Data Privacy Act.
Pagdoon niya man na malinig an saiyang konsensya asin wara siyang aram manungod sa cockfighting asin dae man siya sa betting o pagtaya gamit an online wallets.
Suhestyon niya man na ka-olayon muna sa sunod an saindang pigvi-video asin aramon muna kun ano an nahiling ninda asin dae tulos ipagpost sa social media.
Pighayag pa ni Cong. Briones an nakatalaan man siyang magsunad nin propwestong ley nganing ipagbawal an anumang klase nin online gambling na nakaraot na sa buhay kan pirang indibidwal asin pamilya.
