Legazpi City- Nagpupuon na an plano kan Lokal na Gobyerno kan Libon asin kan National Housing Authority para sa pagre-relocate kan mga residenteng naapektarak kan nakalihis na panrarapado ni Bagyong Kristine na kun sain kadakol na kaharungan an nadanyaran kan pagbabaha asin pagrasay kan daga.
Sa intrevista kan Bombo Radyo Legazpi kay Mayor Das Maronilla, an Alkalde kan banwaan nin Libon, nagsasagibo na sa ngunyan nin serye nin pag-oolay an LGU asin an NHA para sa pag-aaram kan mga potensyal na lugar na pwedeng paglipatan kan mga residente.
Maabot sa limang ektarya an pighahanap na lugar para sa haros 100 na pamilya na apektado kan nakalihis na raot nin panahon.
Sa presente igwa nang 3 na lugar na pwedeng pagkaagan kan relocation site asin naghahalat na sana nin approval hale sa MGB para maaraman kun safe ining lipatan asin tugrukan nin mga harong para sa mga residente.
Pigpapahidali na man an paghahanap kan lugar huli ta hasta sa ngunyan dakol man giraray na residente an nagtitinir sa evacuation center asin pinaglalaoman na hasta sa kapaskuhan ini magtitinir sa evacuation center.
Sa presente pinagbabawalan an mga apektadong residente na bumalik sa saindang mga harong huli sa peligrong dara kan posibleng pagrasay kan daga. Igwa na man na nakabantay na mga otoridad sa apektadong lugar para maasigurar na dae magtitinir sa mga harong na nadanyaran kan landslide.
