LEGAZPI CITY – Igwa nang syertong 6 gold, 4 silver, asin 20 bronze medals asin nasa ika-11 pwesto sa latest overall tally an rehiyon Bicol sa nagpapadagos na palarong Pambansa 2025 sa Ilocos Norte.
Segun ki Department of Education Legazpi City Division Sports Officer Dexter Sison sa intrevista kan Bombo Radyo Legazpi na piglaoman na ninda na magigin hibaba an saindang makukuwa huli ta overage asin graduate na an ibang mga medal earners kan nakaaging Palaro 2024.
Alagad paglilinaw niya na dikitan an mga lamang kan ibang rehiyon pag-abot sa medal tally partikular na an nasa ika-lima hasta ika-sampulong pwesto asin aminado ini na base sa medal tally an nagtetenir na dominante an National Capital Region.
Sa kabilugan suboot an nagtetenir na salbado an mga delegado kan rehiyon hasta sa ikalimang aldaw kan palaro.
Pigtaram pa kan opisyal na makakakuwa man an mga medalist kan rehiyon bicol nin incentives hale sa mga local government kaini afuera pa an hale sa Deped region 5.
Nagmamawot man ini na makakakuwa nin medalya an rehiyon sa boxing mantang nakatalaan mang mag-uli an first batch kan mga delegado sa Mayo 31 asin sa Hunyo 1 an second batch.
Mientrastanto, pigdugang pa ni Sison na nagin magayon an feedback kan mga evaluator mapadapit sa kalinigan kan saindang mga biletting center kun kaya piglalaoman ninda na maipapadagos kan rehiyon an winstreak para sa pagigin most eco-friendly delegation sa Palarong Pambansa.
