LEGAZPI CITY- Matatapos na an enot na batch kan mga benepisyaryo kan Training for Better Access to Job Opportunities (TraBAJO,) an skills training program kan Legazpi City.
Magigirumduman na kan taon 2015, nag-alokar an Department of Interior and Local Government (DILG) sa syudad nin P10 million ngani na makapag-opresir nin skills training sa mga myembro kan komunidad na dae nin kakayanan para sa pormal na edukasyon.
Sigon ki Diosdado “Dads” Raneses, Public Employment Services Office (PESO) manager kan Legazpi, pighahandaan na ninda an recognition rites para sa pagtatapos kan labi sa 600 na grantees kan nasambitan na programa.
Kabale sa mga skills training na pinag-adalan kan mga ini an welding, cookery, bartending, asin housekeeping.
Katabang kan PESO an ibang eskwelahan sa syudad asin mga ahensya sa pagtukdo sa mga skills trainee.
Pan-duwang taon an pondong itinao kan DILG na gikan sa Canadian government kun sain ngunyan na taong 2017 an ika-duwa asin huring batch para digdi.
Alagad kun magin matrayumpo suboot an programa, pigpaplano ni Mayor Noel Rosal na ipagpadagos ini sa mga masunod pang taon.
Ipi-orgulyo man ni Raneses na madaling nakakua nin trabaho an saindang mga trainee maski dae pa nakakagradwar sa programa.
Sinara na maray an mga partisipantes kan TraBAJO na iyo an mga tawong disabled, out of school youth, senior citizen, pamilya kan mga myembro kan AFP asin PNP na nagadan mantang nasa serbisyo asin mga katutubo.
