LEGAZPI CITY- Piglalaomang pormal nang maidedeklarar an pagpupuon kan panahon kan tag-init sa masunod na semana, segun sa PAGASA.
Sa intrevista kan Bombo Radyo Legazpi ki PAGASA Deputy Administrator for Operations and Services Dr. Landrico Dalida Jr., padiit-diit nang nagsi-shift an paros sa nasyon puon sa northeast monsoon pasiring sa easterlies na dara an mainit na paros hale man sa kadagatan kan Pasipiko.
Segun pa ki Dalida na dawa pa suboot panahon nin tag-init, posible pa man na maka-eksperyensya nin pag-uran urog na sa nagkapirang lugar na harane sa kabubuldan na huli sa localized thunderstorms siring man sa Metro Manila asin iba pang urban areas katakod kan pig-aapod na ‘urban heating’ na nagka-causa nin halangkaw na evaporation level asin cloudiness.
Mientras tanto, magigin halipot sana man an summer ngonian na taon na ipigtatakod sa climate change kun saen aminado si Dalida na nakakaapektar man sa accuracy kan weather forecast.
Ipighayag pa ni Dalida na base sa forecast, igwang 0-1 na mabibilog na raot kan panahon ngonian na bulan kan Abril.
