Banga an reaksyon kan publiko sa pagpaluwas kan Bangko Sentral ng Pilipinas (BSP) nin mga bagong salapi na nakabugtak an mga hayop na endemic sa nasyon, kapalit kan mga pandok kan mga bayani.
Segun kay Bayani Abarientos, pabor siya sa bagong disenyo nin huli ta panahon na nganing midbidon asin igalang an inang kalikasan na satuyang pinagpunan asin dudumanan.
Mientrastanto, si Ylil Nermal Carreon an nagtugot man nin huli ta mas mapagal suboot na pekeon an mga kwartang may ladawan nin hayop.
Sa ibong na lado, ipinahayag ni Edgar Furatero an saiyang pag-kahandal sa posibleng gastos kan pagpapalit kan disenyo kan kwarta.
Pareho man kaini an sentimyento ni Mathew Del Valle, na nagtataram na posibleng malingawan an mga bayaning nagbuwis nin buhay nin huli sa bagong disenyo.
An historian na si Prof. Xiao Chua an nagpahayag man kan saiyang opinyon, na tila saro suboot ining paglingaw sa satuyang mga bayani.
Sa ibong kan mga magkakaibang pananaw, mantinidong obheto kan BSP na ipahiling an yaman kan kalikasan kan Pilipinas sa paagi kan mga bagong disenyo kan salapi.
