LEGAZPI CITY-Mas hihigotan kan Provincial government kan Catanduanes an seguridad sa pag-angkat nin orig sa tahaw kan pigpapaotob na temporary ban sa Hogs, Pork, Pork-by Products sa provincia.
Segun ki Catanduanes Governor Patrick Azanza, sa intrevista kan Bombo Radyo Legazpi, na igwa suboot na mga reports kan nakaaging administrasyon sa provincia na mga politikong imbuelto sa pagpapalaog kan inangkat na orig.
Sa presente, dai man suboot tutugutan kan administrasyon an siring kaining gibo kaya mahigot na pig-iimplementar ninda an Executive Order No. 59 s. 2026.
Dai man suboot sinda ma-tolerate maski sisay man na politiko na igwang backer ngani sana palagpason ini.
Dagdag pa ni Azanza, malinaw an saiyang kasuguan sa kapulisan asin coast guard na seryusong iimplementar an temporary ban sa suplay kan orig.
Dadakupon man suboot an sisay man na mag-bayolar sa kasuguan na ini asin papatawan nin penalidad o sanction basado sa ley.
Mientras tanto, sa lado kan hog raisers, kokontrolon man ninda an presenteng sitwasyon asin parte kan kooperasyon an imantenir an tamang presyo kan orig sa provincia.
Huli sa bastante pa an suplay, sierto suboot na dai man kaini maaapektaran an presyo.
Enkaso man na makumpiska na nagpapalaog nin Hogs, Pork, Pork-by Products sa provincia, ide-dispose an mga ini susog sa direktiba kan veterinery office
