LEGAZPI CITY-Hahagadon kan piskalya kan Kamara sa Impeachment Court na ideklarar na ‘hostile witness’ si Davao City Mayor Sebastian “Baste” Duterte kun ini mag-appear ngani magtestigo sa impeachment trial kan saiyang tugang na si Bise Presidente Sara Duterte.
Susog sa legal spokesperson asin abogado kan piskalya kan Kamara na si Atty. Benjamin Tolosa Jr., dapat ngunang maestablisar na an interes ni Baste kontra sa mga interes kan piskalya, bago siya ideklarar na sarong ‘hostile witness’ .
Kun an kahagadan itatao, an piskal magkakaigwa nin mas dakulang libertad sa paghapot ki Mayor Baste—kaiba an paggamit nin mga leading questions—maski an pinal na desisyon yaon sa Impeachment Court.
An testimonya ni Baste piglalaoman na mapadali an paglipat kan pokus kan prosekusyon hale sa sadiring Statement of Assets, Liabilities, and Net Worth (SALN) ni VP Sara Duterte pasiring sa mga rekord na nakua sa mga pribadong kumpanya asin ahensya kan gobierno.
Sa irarom kan Article II kan impeachment case, kaiba sa alegasyon kay VP Sara, an dai nag-divest kan saiyang sadiri sa business interests asin padagos na nagpartisipar sa mga aktibidad sa negosyo mantang nagseserbi bilang Bise Prsidente.
Piglalaoman na enot na mapresentar kan piskalya an mga opisyales gikan sa Civil Service Commission, Securities and Exchange Commission, asin Philippine Government Electronic Procurement System nganing i-authenticate asin isumiter an mga record na ini.
An mga rekord na ini gagamiton sa pagkumparar kan mga interes sa negosyo na ipinahayag ni VP Sara Duterte sa saiyang SALN laban sa mga dokumento hale sa mga kumpanya asin ahensya kan gobierno.
Orihinal na nakatalaan na mag-atubang si Baste sa Setyembre 23, kaiba an abogadong si Atty. Gary Samonte asin si Police Major Jerrickson Sangalang.
Alagad, an schedule na ini posibleng magbago, huli ta an mga argumento manungod sa numero kan mga boto na kaipuhan para sa conviction ni VP Sara nakatalaan man na dangugon sa aldaw na ini.
Piglalaoman na matao nin record si Samonte hale sa PhilHealth Regional Office XI, mantang matao man nin impormasyon an Sangalang manungod sa mga badil na nakarehistro sa pangaran ni VP Sara Duterte asin kan saiyang agom na si Atty. Manases Carpio.
