LEGAZPI CITY-Inaprubahan na kan Kamara sa ikaduwang pagbasa an propwestong ley na obhetong palawigon an bisa kan Professional Regulation Commission (PRC) identification cards hale sa presenteng tulong taon pasiring sa limang taon.
Sa paagi kan voice voting, pinasar an House Bill (HB) No. 8876 ngani mabawasan an gastos asin puro-utrong proseso kan renewal para sa milyun-milyong propesyonal na Pilipino.
Obheto man suboot kaini na mabawasan an pasanon kan mga paratukdo, nars, architect, accountant, asin iba pang propesyonal na pigkokonsiderang haligi kan ekonomiya.
An lakdang na ini, parte kan pagbawas sa red tape o ngani gibuhong marikas asin makatawo an serbisyo kan gobierno.
Nagkapira sa probisyon kaini: Palawigon sa limang taon an validity kan gabos na Professional Identification Cards (PIC); Atasan an PRC Information and Communication Technology Service na i-upgrade an saindang digital registration system sa laog kan anom na bulan poon sa pagpapaotob nin ley asin bawasan an halabang pilahan asin i-decongest an appointment system kan PRC sa paagi kan pagbawas kan mga taunang transaksyon.
