LEGAZPI CITY- Nahiling an pagbaba sa presyo kan nagkapirang mga produkto sa merkkado kaibanan na an bagas, makalihis an holiday season.
Segun ki Department of Agriculture Bicol spokesperson Lovella Guarin sa intrevista kan Bombo Radyo Legazpi na basado sa bantay presyo monitoring kan ahensya sa nagkapirang merkado, an well milled rice na dating nasa P54 hasta P55 an nasa P50 na sana.
Magin an karne an nagkaigwa man nin pagbaba kumparar kan nakalihis na Disyembre.
Paliwanag kan opisyal na kan nakalihis na holiday season nagkaigwa nin paglangkaw sa demand kaya naglangkaw man an presyo kan nagkapirang pangenot na babarakalon.
Sa ibong kaini, nahiling man an paglangkaw kan presyo kan galunggong nin hasta sa P50.
Aminado man si Guarin na an mga agricultural produce an bako sakop kan pigpapaluwas na suggested retail price kaya dae marhay nagkakaigwa nin poder sa pagbaba kan presyo kaini.
Mientras tanto, sinierto kan opisyal na aaksyunan kan ahensya an anuman na madidiskubre na mga pang-aabuso kan mga traders asin mga paratienda.
